اختاروا الي هتتجوزوهم ادوا نفسكم فرصة كبيرة وشوفوا اهل الدين – افتح قلبك
مشاكل اجتماعية مشاكل الشباب

اختاروا الي هتتجوزوهم ادوا نفسكم فرصة كبيرة وشوفوا اهل الدين

وحياة غلاوة الغاليين عندكم اختاروا الي هتتجوزوهم الي هاحكيه في البوست هنا حصل معايا انا شخصيا متكروتوش الخطوبة وادوا نفسكم فرصة كبيرة وشوفوا اهل الدين يخونا واهل التقوي سيبكم بقي من معاه كام ومن هو ابوه شغال ايه وهو وظيفته ايه
الخطوبة شرعت في القرءان
البوست ده من باب الأمانة ومن البلاوي الي بنشوفها ونسمع عنها في حياتنا
في مرة كنت قاعد في المحل عندي ولقيت بنت قاعدة في الشارع عندها تقريبا ١٣ سنة روحت وجيت وروحت وجيت لقيتها لسه قاعدة والوقت اتأخر داخل عالساعة ١٢
المهم قلقت عليها قولتلها هو فيه حاجة معاكي ؟
قالتلي اه ده ماما جابتني هنا وسابتني ومشيت !
قولتلها إزاي وبعد جدال كتير طلعت من منطقة اول مرة اسمع عنها المهم نشرت علي جروب وعرفت المكان ده فين وكان الوقت أتأخر و المشوار بعيد فضلت استأذن في البواب ومراته واترجاهم بس البنت تبات عندهم للصبح لاننا متغرب وكل الي معايا في الشقة عزاب وطبعا ميصحش باي وضع من الاوضاع لا اسيبها في الشارع ولا تبات معايا
البواب ومراته وافقوا وتوكلت علي الله الصبح وروحت بيها طبعا كنت قلقان وخايف ليكون البنت دي وراها مصيبة او حاجة كبيرة بس توكلت علي الله ونزلت هناك قالت دي منطقتي روحت لقيت مكتب عقارات هناك حسيتهم جماعة صعايدة قولتلهم معايا مشكلة صفتها واحد اتنين تلاته ومحتاجكم معايا لاحسن بصراحة خايف
قالولي ماشي جم معايا واحنا في الطريق اخدنا واحد شيخ وقبل منروح هناك الجماعة اتكلموا مع البنت طلعت البنت بتكذب امها لا رمتها ولا ضيعتها ده البنت هربانة من أهلها !
اول مروحت عندهم المنطقة ووصلنا عند بيتهم مرات عمها شافتها نزلت تجري من الدور الثالث في نفس واحد وقالت انتي فين من امبارح محدش نام و كله بيدور عليكي في المستشفيات والاقسام كلمت باباها وعمها وجم واخدين الشارع جري !
وانا واقف كده في ثواني حسيت اهل البنت هيتفضحوا اول مشوفت عمها اخدته في حضني قولتله بصوت عالي سمعه كل الي هناك ازايك يا ولد عمي عامل ايه وروحت موشوشه في ودنه اسكت لحد ما نطلع فوق
طبعا انا لا أعرفه ولا يعرفني بس علشان خاطر الناس الي واقفة والفضايح قولتله فلانة الي هي بنتهم يعني باتت مع امي واخواتي البنات ومش تزعلوها تاني وطلعنا لفوق بقي
وابوها جه وامها واخوالها واعمامها و كانت لمة كبيرة جدا
تخيل ياخي الموضوع كان فين ؟
الموضوع باختصار شديد جدا.
ابوها وامها متزوجين ليهم حوالي ٢٠ سنة وبص عالرقم علشان متتصدمش
امها عملت عملية قلب مفتوح فالدكتور قال لزوجها لا تقرب منها ولا تنام معاها تقريبا لمدة اكثر من سنة
تقريبا سنة ونص طبعا والراجل المراهق ده عديم الكرامة و الادب والإنسانية معجبوش الموضوع وقرر يتزوج تاني واخد شقة وجهزها وتمام جدا اهوه
هي طبعا الموضوع صدمها الي هو بعد ٢٠ سنة تعمل فيا كده و ترميني ؟!
بدأت هي تزود عليه مصاريف البيت علشان خاطر متخليهوش يتجوز راح سايبلها البيت و مشي
هي تبعتله العيال يضربهم ويرجعهم
العيال يروحوا لامهم تضربهم وتوديهم لابوهم
في النص بقي ضاعت البنت دي وقررت تهرب من الضرب والاهانة بتاعت كل يوم
علشان راجل والله كلمة راجل ما يستحقها عديم مروءة
وام صعبانة عليها نفسها
سيبنا موضوع البنت وقعدنا انا والشيخ والجماعة الصعايدة اكثر من خمس ساعات نحاول نصلح الامور ابدا
رفض تام لاي حل
مشينا كلنا واحنا نشعر بالأسي والحزن
يا جماعة بالله عليكم سيبكم من موضوع شقة تمليك ولا ايجار دهب ب ٥٠ الف ولا ب ١٠
هيجيب الستاير ولا النجف
سيبكم من كل ده دوروا علي الرجالة دوروا علي الدين دوروا علي الاصول
النبي صل الله عليه وسلم قال اذا جاءكم من ترضون دينه وخلقه فزوجوه
طيب ولو محصلش يا رسول الله ايه الي هيحصل
باقي الحديث
إلا تفعلوه تكن فتنة في الأرض وفساد كبير رواه الترمذي وغيره
فتنة وفساد وهو ده الي بيحصل النهاردة
صدقوني الي عنده دين وأصول عنده كل حاجة ولو مش معاه حاجة
والي معندوش لا دين ولا اصول معندوش حاجة ولو كان اغني شخص في الأرض

اترك رد