مشكلة شاب عشرينى تعرض للتحرش وهو صغير | افتح قلبك
مشاكل اجتماعية مشاكل الشباب

مشكلة شاب عشرينى تعرض للتحرش وهو صغير

انا شاب ٢٤ سنه من وانا طفل كان في حاجات كتير اوى محروم منها اولها عطف وحنان الاب.. ملقيتش نفسي غير شخص حساس اوى عكس اخواتى كانت اقل حاجه بتفرق معايا نفسيا .. كنت دايما زعلان وحاسس انى فاقد حاجات كتير اوى سواء ف عيلتى او ف صحابي اللى بلعب معاهم .. كنت منطوي .. كل يوم اقعد ف مكان وافضل اعيط لوحدى بسبب حاجات كتير صحيح لما بفتكرها دلوقتى بحسها تافهه لكن وقتها كانت كبيره عندي اوي .. المهم ..

لحد ماجت ليله غيرت مسار حياتى وشقلبت تصرفاتى وطفولتى .. كنت وقتها تقريبا ٥ سنين يمكن ف اولى ابتدائي واحد اعتدي عليا جنسيا .. شخص بالغ عنده ١٧ سنه مثلا اعتدى عليا وانا ٥ او ٦ سنين ..

مكنتش فاهم حاجه ف الدنيا ولا عارف هوا بيعمل معايا ايه .. كان صعب جدا اروح اتكلم مع حد من العيله واحكيله .. يمكن من الخوف .. او من عدم الادراك لخطورة الموضوع ..

المهم استمر الموضوع فتره كبيره .. وللاسف بقا يدخل من الجانب العاطفي . زى انه يقولى كلمه حلوه او يجيبلى لعبه ولو بنص جنيه واستمر كده فتره لحد ما بدأت اوعي الى حدٍ ما

بدأت ارفض الموضوع دا .. وكان بيقابلنى بالتهديد زى انه مثلا يقول لحد من اخواتى او صحابي .. بدأت اخضع للتهديدات دى غصب عنى وانا خايف حتى اروح اقول لأخويا لانى عارف انه مش هيستوعب ومش هيقف جمبي .. علاقتنا اصلا مطفيه ..

بعدها بدأت اكبر يمكن ل سن ١٢ سنه مثلا او ١٣ بدأت رغبته فيا تقل زى مايكون حبه للطفل الصغير بس واول ماحس انه كبرت قدامه مبقاش يطلب منى .. وقتها اتبسطت وقلت خلاص الموضوع خلص . محستش بنفسي الا وبقا عندى رغبه شديده اوى للموضوع دا .. تقريبا اتعودت عليه وبقا شئ اساسي .. من غير اى وعي ديني او طبي او اخلاقي .. مش عارف اذا كان الموضوع وحش او حرام او مينفعش بدأت بعدها بفتره الجأ انى ادور ع حد . كنت ف ١٧ مثلا ووقتها كان عندى نت . بالصدفه بدأت ادخل العالم دا وافهمه كويس واشوف جروبات وصفحات وشات واعرف دا ودا ودا وانا مش متصور خطورة الموضوع ..

بدأت اقابل شخص واتنين لحد ال١٩ بدأت افقد رغبتى الجنسيه او العاطفيه تجاه اى بنت اللى انا اصلا محستهاش م الاساس .. ولا كان عندى الاب اللى احكيله ويفهمنى ويساعدنى ولا لأخ اللى اتسند عليه واشكيله ..

محستش بنفسي الا وانا بقا عندى معارف خصوصا ان الموضوع بقا سهل ع اى حد يعمله ويلجأ ليه باختلاف الاسباب .. لحد ماجيت ف سن ال٢٠ قررت ابعد نهائيا واتعالج .. روحت لدكاتره كتير منهم المشهور وغالي مبقتش احس انى بتحسن . قلت يمكن العيب فيا .. روحت لغيره .. حتى الدكتور مبقاش يسمعنى زى مانا عاوز .. انا كنت محتاج اتكلم بصدق واحكى كل حاجه وحد يسمعنى ويوجهنى .. كل اللى كنت بعمله انى بدفع فلوس كتير وف الاخر اخد شوية ادويه واقعد معاه ربع ساعه واروح لحد مابقيت مش عارف اوفر فلوس اروح اكشف بيها .. اتخنقت وحسيت انى مليش علاج . من ناحيه ف ناس بتقول مفيش علاج ولو ف فياخد منى سنين يمكن ٧ او ١٠ سنين ومن ناحيه تانيه ناس بتقول ف علاج .. مبقتش فاهم حاجه

وقفت عند حيطه سد .ولا انا قادر ابعد ولو بعدت ببعد جسديا لكن عاطفيا لا . ولا قادر اتجوز واحب زى اى حد .. ولا قادر افهم انا ايه او عايش ليه .. حياتى اتلخبطت او باظت .. تعبت نفسيا جدا من الناس اللى ف العالم دا .. ولا عشت الحياه اللى بدور عليها

انهارده بقالى ٣ سنين ف محاوله العلاج . مش حاسس باى تحسن من وقت مابدأا او يمكن ملقتش الدكتور الصح ..

هدفي الاول وهو التوعيه .. حبوا ولادكوا ياجماعه اوى اوى اوى خصوصا الاب . ميبقاش همك كله انك تجري وتسافر وتجيب فلوس ف مقابل ان حياة ابنك هتضيع وتبوظ ببساطه . لو شايف ان الاكل والفلوس اهم من مستقبل ابنك تبقا غلطان .. خدوا بالكوا من اطفالكم وخصوصا الاقارب .. لانى والله سمعت عن اعتداءات من الدرجه الاولى والتانيه يعنى مش بعيد ..

تابعوهم واقروا عن الموضوع دا واعرفوا اثاره اللى ممكن تبان عشان لو حصل ف يوم مع ابنك او بنتك تبقا عارف وتروح تعالجه

انا هدفي التانى فبتمنا لو هنا دكتور نفسيه متخصص ف علاج الموضوع دا يتكفل بيا ويساعدنى خصوصا انى مبقتش قادر اصرف اى فلوس تانى عليه بعد كل الدكاتره اللى رحتها .. الموضوع اه هيكون محرج جدا ليا لكن بحاول اعمل اللى عليا باى طريقه عشان لما اقابل ربنا اقوله يارب انا حاولت وجاهدت نفسي ويبقا ليا حِجه اقولها قدام سؤاله ..

ادعولي ياجماعه .. واسف ع الاطاله

اترك رد